Aksjonen "La bygdene leve, Jens!" New

(Nr 25 - 2010) Aksjonen "La bygdene leve, Jens!" er opptatt av framtida for Bygde-Norge. Aksjonen er tverrpolitisk, og breidt samansett både når det gjeld tilhald i organisasjonar, yrke og interesser.

Av Inge Staldvik

Det skjer dessverre fråflytting og forgubbing i delar av landet, ikkje minst i grissgrendte strok. Aksjonen meiner dette skuldast m.a. ein statleg politikk som råkar distrikta hardt, og dagens rovdyrpolitikk gjer tilhøva verre for både beitenæringane og innbyggjarane.

Rovdyra er i ferd med å ta livskrafta frå reindrifta og den samiske kulturen. Rovdyra øydelegg beitenæringane og den berekraftige matproduksjonen basert på utmarksressursar i mange område. Livskvaliteten til folket har vorte svekka pga stor konsentrasjon av rovdyr i visse distrikt.

Aksjonen arrangerer ein demonstrasjon utanfor Stortinget fredag den 17. desember frå kl 1000 til kl 1200. Demonstrasjonen blir avslutta med å levera eit krav til stortingspresidenten om endringar i rovdyrpolitikken.

Vi vonar Friheten òg er opptatt av dette saksfeltet, og håpar difor at de finn høve til å dekkja denne tilskipinga. Heile aksjonsgruppa står sjølvsagt til rådvelde om det skulle vera spørsmål og/eller innspel.

Med ønske om eit godt samarbeid for betre livskvalitet på bygda, for aksjonen "La bygdene leve, Jens!"